Tragjedia me dy viktima në Vaun e Dejës, QKUM: Ambulanca e zonës ishte me defekt

Qendra Kombëtare e Urgjencës Mjekësore ka reaguar për tragjedinë në Vaun e Dejës, ku humbën jetën dy persona pasi u goditën nga rryma elektrike.

QKUM sqaron se bëhej fjalë për dy raste të ndara, të ndodhura në momente të ndryshme, ndërsa në rastin e parë ambulanca lokale ndodhej jashtë funksionit për shkak të një defekti teknik.

Sipas njoftimit zyrtar, thirrja e parë për ndihmë është regjistruar në orën 18:03. Në vendngjarje kishte mbërritur një infermiere e zonës, e cila kishte nisur menjëherë reanimimin kardiopulmonar, por pa mundur të rikthente qarkullimin spontan.

Pak minuta më vonë, një tjetër person u godit nga rryma. Bëhet fjalë për elektricistin që kishte shkuar në vendngjarje për të ndërhyrë në problemin elektrik. Thirrja për ndihmë për rastin e tij u regjistrua në orën 18:53.

Edhe për këtë rast u nis një ambulancë nga Shkodra, e cila mbërriti në orën 19:54. Sipas QKUM, elektricisti u gjet pa shenja jete dhe rasti u konstatua si “Kod i Zi” në vendngjarje.

Në reagimin e saj, Qendra Kombëtare e Urgjencës Mjekësore thekson se goditja elektrike është një urgjencë me rrezik të lartë për jetën dhe në rastet e rënda mund të shkaktojë arrest kardiak dhe vdekje të menjëhershme.

NJOFTIM PËR MEDIA:

Në lidhje me ngjarjen tragjike të datës 29 gusht 2026 në Vaun e Dejës, Qendra Kombëtare e Urgjencës Mjekësore (QKUM), në funksion të transparencës dhe informimit të saktë të publikut, sqaron dinamikën e ndërhyrjes së shërbimit të urgjencës mjekësore. Në këtë ngjarje janë regjistruar dy raste të veçanta, të dyja si pasojë e goditjes nga rryma elektrike, të ndodhura në momente të ndryshme. Rasti i parë është raportuar si urgjencë për goditje elektrike. Në vendngjarje ndodhej një infermiere e zonës, e cila kishte nisur menjëherë manovrat e reanimimit kardiopulmonar, pa mundur të rikthente qarkullimin spontan.

Sipas të dhënave të regjistruara në sistemin e urgjencës, thirrja është marrë në orën 18:03. Në atë moment, ambulanca e Vaut të Dejës ndodhej jashtë funksionit për shkak të një defekti teknik. Për këtë arsye, drejt vendngjarjes është nisur ambulanca nga Spitali i Shkodrës, e cila ka mbërritur në orën 19:44. Manovrat e reanimimit janë vijuar edhe gjatë transportit drejt Spitalit të Shkodrës. Pavarësisht përpjekjeve të personelit shëndetësor, nuk u arrit rikthimi i qarkullimit spontan dhe pacienti humbi jetën.

Rasti i dytë i përkiste elektricistit, i cili, disa minuta më vonë, kishte shkuar në vendngjarje për të ndërhyrë në problemin elektrik. Gjatë ndërhyrjes, edhe ai u godit nga rryma elektrike dhe humbi jetën. Për këtë rast, kërkesa për ndihmë mjekësore është regjistruar në orën 18:53. Në vlerësimin fillestar, personi rezultonte pa shenja jete. Në këtë moment, ambulanca e dytë nga Shkodra është nisur drejt vendngjarjes dhe ka mbërritur në orën 19:54. Rasti është konstatuar dhe referuar si Kod i Zi në vendngjarje.

Goditja elektrike përbën një urgjencë mjekësore me rrezik shumë të lartë për jetën dhe, në rastet e rënda, mund të shkaktojë arrest kardiak dhe vdekje të menjëhershme. Mbi çdo sqarim institucional, kjo mbetet para së gjithash një ngjarje tragjike, e cila solli humbjen e dy jetëve njerëzore.

Qendra Kombëtare e Urgjencës Mjekësore shpreh keqardhjen e thellë për këtë humbje dhe u përcjell ngushëllimet më të sinqerta familjeve dhe të afërmve të dy viktimave. Në këto momente të vështira, QKUM bashkohet me dhimbjen e familjeve për humbjen e njerëzve të tyre të dashur. QENDRA KOMBËTARE E URGJENCËS MJEKËSORE.