Bardhi akuzon qeverinë: Po tenton të mashtrojë Brukselin me VKM-në për zonat e mbrojtura

Kreu i Grupit Parlamentar të PD, Gazment Bardhi, ka reaguar lidhur me projektvendimin e qeverisë për procedurat e vlerësimit mjedisor, duke e akuzuar mazhorancën se po përpiqet t’i paraqesë Bashkimit Europian një masë që nuk adreson problemin kryesor.

Në një reagim në Facebook, Bardhi argumenton se projekt-VKM-ja përcakton mënyrën se si duhet të vlerësohet ndikimi mjedisor i projekteve të ndërtimit që mund të prekin zona të mbrojtura, por nuk ndryshon dispozitat e ligjit të vitit 2024 për këto territore.

Sipas deputetit demokrat, një procedurë shtesë për vlerësimin mjedisor nuk është e mjaftueshme për të përmbushur kërkesat e institucioneve europiane, për sa kohë që ndryshimet ligjore që lidhen me zonat e mbrojtura mbeten në fuqi.

POSTIMI:

Qeveria po përpiqet të mashtrojë Brukselin me një VKM mjedisor, ndërsa ndryshimet famëkeqe në ligjin 21/2024, që hapi zonat e mbrojtura për ndërtime, nuk i prek.

Projekt VKM-ja, e nxjerrë së fundmi për konsultim, përcakton vetëm se si duhet të bëhet vlerësimi mjedisor kur një projekt ndërtimi mund të ndikojë një zonë që gëzon mbrojtje. Ky mund të jetë një filtër shtesë, por nuk mund t’i shitet Bashkimit Europian si adresim i shqetësimit, ndërkohë që ligji që krijoi problemin mbetet i paprekur.

Në rezolutën e Parlamentit Europian thuhet shprehimisht se “Parlamenti Europian shpreh shqetësim serioz për ndryshimet në Ligjin për Zonat e Mbrojtura, të cilat lejojnë projekte të mëdha infrastrukturore dhe turistike në zona ekologjikisht të ndjeshme dhe kërkon që këto ndryshime ligjore të zhbëhen”.

Partia Demokratike e ka depozituar në Kuvend nismën për shfuqizimin e ndryshimeve të vitit 2024 në ligjin për zonat e mbrojtura. Kjo është edhe një nga kërkesat e qytetarëve që kanë protestuar për mbrojtjen e këtyre territoreve, por që vazhdon të injorohet nga kryeministri i betonit dhe i parave të pista.

Qeveria ka dy rrugë:

Ose të dëgjojë shqiptarët dhe Brukselin, duke rikthyer ligjin për zonat e mbrojtura në standardet që kërkon anëtarësimi i Shqipërisë në Bashkimin Europian.

Ose rruga tjetër është ta çojë ligjin në referendum dhe t’i lërë shqiptarët të vendosin.

Të mos ketë frikë nga vota.

Kryeministra gjejmë plot. Shqipëri kemi vetëm një.