10 librat e Vitit të David Hudhrit

David Hudhri është përkthyes dhe botues. Ai drejton shtëpinë botuese “Minerva”. Përzgjedhja e tij për Politiko.al vijon si më poshtë: 

1. Kalendari i mençurisë – Leo Tolstoy

Botues: Minerva

Përkthyes: Granit Zela

Një libër me citate për çdo ditë të vitit, të përzgjedhura nga Tolstoi përgjatë 15 viteve. Ai ka distiluar të gjithë mençurinë e botës në një libër të lehtë për t’u lexuar, kuptuar, që të pasuron mendjen dhe shpirtin, e që nuk të merr më shumë se 5 minuta çdo ditë.

2. Benjamin Franklin – Walter Isaacson

Një biografi e shkëlqyer e një figure shumëdimensionale, Franklin ishte shkrimtar, botues, shkencëtar, shpikës, diplomat, politikan dhe një prej baballarëve themelues të SHBA-së. Ka kaq shumë për të mësuar prej këtij individi të rrallë, e për t’i vënë në zbatim në jetë.

3. Fuqia e nënvetëdijes – Joseph Murphy

Botues: Argeta LMG

Përkthyes: Petro Plasa

Një libër i shkëlqyer dhe klasik për të kuptuar fuqinë e nënvetëdijes dhe se si ta shfrytëzosh për të arritur jetën që dëshiron, në çfarëdo aspekti. Është si një manual për përdorimin e mendjes.

4. 1984 – George Orwell

Botues: Onufri

Përkthyes: Arben Kallamata

Ky roman distopik botuar në vitin 1949, kur e lexon duket sikur është shkruar sot. Të bën të kuptosh më mirë mekanizmat pas propagandave shtetërore e jo vetëm, si dhe të çmosh më tepër lirinë individuale të cilën e marrim kaq të mirëqenë.

5. Shkurtësia e jetës – Seneca

Botues: Minerva

Përkthyes: Blendi Lami

Një libër i shkruar para gati dymijë vitesh, i shkurtër siç ka titullin, por tejet i thellë. Ne ankohemi se jeta është e shkurtër, e megjithatë sillemi sikur nuk do të ketë fund, thotë Seneca. Të vë para përgjegjësisë për mënyrën se si e shpenzon kohën, dhe të udhëzon që të jesh i pamëshirshëm për ta mbrojtur kohën tënde nga shpërqendrimet, njerëzit e tjerë, aktivitetet e padobishme. Jeta është mjaftueshëm e gjatë për atë që di ta përdorë siç duhet.

6. Nexus – Yuval Noah Harrari

Botues: Botart

Përkthyes: Aulona Ormeni

Një përmbledhje e progresit njerëzor dhe përdorimit e shpërndarjes së informacionit që nga kohët e lashta, deri në ditët e sotme, dhe një paralajmërim për të ardhmen në lidhje me inteligjencën artificiale, e cila nuk është mjet pa inteligjencë, por mund ta përpunojë informacionin e të marrë vendime duke zëvendësuar kështu njeriun, e duke e kthyer në një rrezik për shoqërinë.

7. 48 ligjet e pushtetit – Robert Greene

Botues: Pema

Përkthyes: Fon Ilia

Thuhet se ky libër ka informacione aq të rrezikshme, saqë është ndaluar të lexohet nëpër burgje. Ilustruar me shembuj të shumtë figurash të njohura nga historia, të mëson artin e pushtetit, si ta përdorësh e si të mbrohesh prej tij.

8. Etika nikomakeane (Nicomachean Ethics) – Aristoteli

Vepra më e mirë e Aristotelit për etikën, të udhëzon se si të jesh njeri më i virtytshëm, si të jetosh më mirë, si të përmirësosh karakterin, si të veprosh në përputhje me të mirën dhe të drejtën, gjëra të cilat Aristoteli thotë se janë baza e një jete të lumtur.

9. Can’t Hurt Me (Nuk më lëndon dot) – David Goggins

Një libër jashtëzakonisht motivues për përmirësimin e vetes, disiplinën, ambicien. Autori tregon historinë e jetës së tij, se si kapërceu vështirësi të mëdha për t’u bërë Navy SEAL dhe sportist. Të mëson të përqafosh parehatinë, vështirësitë, vuajtjen, dhimbjen, në rrugën drejt arritjes së synimeve të tua dhe drejt realizimit të potencialit tënd.

10. How Not to Be Wrong: The Power of Mathematical Thinking (Si të mos jesh gabim: fuqia e të menduarit në mënyrë matematikore) – Jordan Ellenberg

Një libër i shkëlqyer i cili përmes matematikës, që duam apo s’duam prek gjithçka që bëjmë, na ndihmon të përdorim logjikën, të mendojmë më qartë, të marrim vendime më të drejta, të analizojmë jetën më mirë dhe ta kuptojmë botën më mirë.