“Është falas, por nuk është falas”, një vit i Evis Salës mes propagandës dhe gafave virale

Dorëheqja e Evis Salës nga posti i ministres së Shëndetësisë mbyll një eksperiencë jo më shumë se një-vjeçare në krye të një prej institucioneve më të ndjeshme të qeverisë.

Megjithatë, me largimin e saj mund të thuhet se bilanci i saj politik në këtë 1 vit la pas vetëm një seri premtimesh propagandistike,  përplasjesh publike dhe me disa deklarata që u kthyen në material viral në rrjetet sociale.

E prezantuar nga Edi Rama në shtator 2025 si një figurë me eksperiencë ndërkombëtare dhe profil akademik, Sala u shfaq në fillim me misionin se do të sillte një tjetër standard në sistemin shëndetësor.

Në ceremoninë e marrjes së detyrës, më 20 shtator 2025, ajo e përcaktoi si një nga sfidat kryesore zgjidhjen e rimbursimit të barnave onkologjike.

“E palejueshme për ne që barnat onkologjike nuk janë plotësisht të rimbursueshme. Kjo është një sfidë edhe e imja. Është e bëshme”, deklaroi Sala në ditën e prezantimit si ministre. 

Por pikërisht Onkologjiku do të ishte një nga temat që do ta vendoste ministren përballë kritikave më të forta.

Më 23 prill 2026, gjatë një interpelance në Kuvend, opozita ngriti një sërë problemesh për shërbimin onkologjik. Mes tyre u përmend mungesa e funksionimit të brakiterapisë dhe kapacitetet e pamjaftueshme për pacientët. Sipas tyre , për rreth 120 pacientë që kryenin kimioterapi në ditë kishte vetëm 30 poltrona.

Përballë këtyre kritikave, Sala deklaroi se “sot në Qendrën Spitalore Universitare Nënë Tereza nuk mungon asnjë medikament”.

Ishte një prej deklaratave që mori vëmendje të madhe publike, pikërisht sepse u bë në një kohë kur problematika e barnave dhe trajtimeve në Onkologjik vazhdonte të ishte në qendër të debatit.

Vetëm disa javë më herët, më 5 mars 2026, gjatë një konference për reformimin e shërbimit onkologjik, gazetari Osman Stafa i kishte drejtuar ministres një pyetje konkrete mbi mungesën e barnave.

Ai solli si shembull pacientët me kancer të prostatës që asokohe kishin dy muaj pa terapi dhe foli për mungesën e acidit folinik

Sala u përgjigj se ministria kishte marrë masa për stabilizimin e furnizimit dhe se ekipi ishte gjithmonë në alert për situatat akute.

“Kemi marrë disa masa për qendrueshmëri në furnizimin me barna. Ekipi është gjithmonë në alert për të adresuar situatat akute për pacientët, por duhet një zgjidhje e përhershme. 

Kemi punuar edhe për protokolle shumë të mira që linjat e trajtimit të jenë të standartizuara sipas BE, kjo bën që të kemi një furnim të qëndrueshëm”, u përgjigj ministrja.

Në vend të një bilanci të thjeshtë të furnizimit me barna, debati u kthye kështu në një përplasje mes asaj që deklaronte ministria dhe asaj që raportohej nga pacientët, opozita dhe gazetarët.

Por një tjetër deklaratë e Salës do të mbahej mend që në ditët e para të saj në detyrë.

Më 20 shtator 2025, teksa prezantohej në QSUT, ministrja e vlerësoi infrastrukturën e spitalit dhe deklaroi se “spitalet në vendet e zhvilluara të botës nuk kanë asgjë më shumë” se spitalet shqiptare. 

Ishte një fjali që tingëllonte si reklamë për sistemin shëndetësor shqiptar, në një kohë kur vetë ministrja sapo kishte marrë detyrën dhe kishte identifikuar si një nga sfidat e para problemin e rimbursimit të barnave onkologjike.

Një tjetër premtim ishte ai për mjekët që largohen jashtë vendit.

“Do mbyllim rrjedhjen e mjekëve të mirë”, deklaroi Sala në shtator 2025, por emigrimi i mjekëve dhe infermierëve ende sot vijon te jetë një nga problemet kronike të sistemit shqiptar dhe një prej sfidave strukturore të shëndetësisë shqiptare.

 Check-Up falas

Në korrik, për shembull, Sala njoftoi zgjerimin e Check-Up-it falas edhe për qytetarët mbi 70 vjeç dhe se kontrolli do të mund të kryhej nga çdo qytetar mbi 35 vjeç, pa kufizim të sipërm moshor. Ajo njoftoi gjithashtu krijimin e shërbimit të parë të Geriatrisë dhe një linje këshillimi për të moshuarit.

Në anën tjetër të bilancit qëndron një sistem ku problemet e Onkologjikut, pritjet për shërbime dhe pajisjet mjekësore vazhduan të ishin mungesë dhe një kalvar vuajtjesh për pacientët shqiptarë. 

Një tjetër deklaratë që do të mbetet në bilancin e një viti të Evis Salës ishte ajo për analizat në QSUT. Më 26 mars 2026, ministrja pranoi publikisht se në spitalin më të madh në vend, pas datës 20 të çdo muaji, analizat rutinë për pacientët e shtruar nuk po kryheshin për shkak të mungesës së fondeve.

“Pas datës 20 të muajit, kemi një problem me analizat e pacientëve të shtruar në QSUT për shkak të fondeve”, deklaroi Sala, duke shtuar se situata do të zgjidhej brenda vitit.

Në muajt pasues, Sala vijoi të promovonte reforma dhe investime në sistemin shëndetësor, ndërsa kjo deklaratë mbeti një nga rastet kur vetë ministrja pranoi publikisht një problem të rëndësishëm brenda sistemit që drejtonte.

Deklaratat që u kthyen në meme

Që në daljen e parë publike si ministre, një pjesë e fjalimit të saj do të merrte një tjetër drejtim në rrjetet sociale.

Mjekësia është falas por dhe nuk është falas

Në QSUT nuk mungon asnjë barnë!

S.Gj-Politiko.al