Protestat në Shqipëri në axhendën e Parlamentit Europian, McAllister paralajmëron debat të posaçëm

Mbi 350 mjekë, infermierë dhe profesionistë të tjerë të shëndetësisë që jetojnë dhe punojnë në Gjermani i janë drejtuar eurodeputetëve dhe deputetëve gjermanë me një apel për situatën në Shqipëri.

Nismës së tyre i është përgjigjur David McAllister, kryetar i Komisionit për Punët e Jashtme të Parlamentit Evropian, në një letër drejtuar mjekes shqiptare Marsi Spiro.

Në përgjigjen e tij, McAllister e cilëson situatën në Shqipëri si një shkak për “shqetësim të madh”, duke përmendur përplasjet gjithnjë e më të dhunshme mes protestuesve dhe forcave të sigurisë, raportimet për dhunë policore, përdorimin e forcave speciale dhe paralajmërimet për kufizime të mundshme të lirisë së tubimit.

Kreu i Komisionit për Punët e Jashtme bën gjithashtu të ditur se i është drejtuar ambasadores së Bashkimit Evropian në Shqipëri, me kërkesën për një vlerësim të situatës dhe informacion mbi masat e ndërmarra deri më tani nga BE-ja.

Një tjetër zhvillim i rëndësishëm lidhet me axhendën e Parlamentit Evropian. Sipas McAllister, Shqipëria do të jetë në rendin e ditës së komisionit më 4 nëntor, në kuadër të prezantimit të raporteve vjetore të progresit për vendet kandidate.

Përveç kësaj, gjatë muajit nëntor planifikohet që zhvillimet në Shqipëri të trajtohen edhe në një pikë të veçantë të axhendës, me qëllim zhvillimin e një debati më të hollësishëm.

“Komisioni për Punët e Jashtme do të vazhdojë ta ndjekë nga afër dhe në mënyrë kritike situatën në terren”, thuhet në përgjigjen e eurodeputetit.

Lajmi është bërë publik nga përfaqësues të nismës së profesionistëve shqiptarë të shëndetësisë në Gjermani, të cilët e konsiderojnë përgjigjen një sinjal se apeli i tyre ka mbërritur në institucionet evropiane.

“Zëri i bluzave të bardha u dëgjua”, shprehen nismëtarët, duke falënderuar të gjithë kolegët që firmosën dhe shpërndanë apelin.

Ata bëjnë të ditur se do të ndjekin nga afër reagimet e mëtejshme të eurodeputetëve dhe deputetëve gjermanë.

Përgjigja 

E nderuara znj. Dr. Spiro,

Ju falënderoj për e-mailin tuaj të datës 20 tetor 2026, të cilin e kam lexuar me vëmendje.Situata aktuale në Shqipëri përbën vërtet një shkak të madh shqetësimi. Në këtë kontekst, duhen theksuar përplasjet gjithnjë e më të dhunshme midis demonstruesve dhe forcave të sigurisë, raportimet për dhunë policore dhe përdorimin e forcave speciale, si dhe paralajmërimet për kufizime të mundshme të lirisë së tubimit.

Unë tashmë i jam drejtuar ambasadores së BE-së në Shqipëri, duke i kërkuar një vlerësim të situatës dhe një pasqyrë të masave që Bashkimi Evropian ka ndërmarrë deri më tani.

Shqipëria zë një vend të rëndësishëm në Komisionin për Punët e Jashtme, si vend kandidat për anëtarësim në Bashkimin Evropian, dhe është në mënyrë të rregullt objekt diskutimesh, gjatë të cilave deputetët shqyrtojnë në mënyrë kritike përparimin e vendit në procesin e zgjerimit të BE-së.

Më 4 nëntor, Shqipëria do të jetë në rendin e ditës së Komisionit, në kuadër të prezantimit të raporteve vjetore të progresit për vendet kandidate.

Përveç kësaj, në Komision po planifikojmë që situatën në Shqipëri ta vendosim në rendin e ditës edhe gjatë muajit nëntor, si një pikë të veçantë, me qëllim që të mundësohet një debat i hollësishëm dhe i zgjeruar.

Komisioni për Punët e Jashtme do të vazhdojë ta ndjekë nga afër dhe në mënyrë kritike situatën në terren.

Me përshëndetjet më të përzemërta për në Braunschweig,

David McAllister