Flash News

Rrjedhje apo gafë teknike? Faqja e Topit të Artë shpall fituesit para kohe

Zbulohen dhjetë finalistët për Topin e Artë 2026, mes tyre edhe Messi

Të rinjtë shqiptarë të fundit në Europë për të ardhurat sipas fuqisë blerëse

Shkresa për policët dokumenton se ligji në Shqipëri zbatohet me urdhër të pushtetit

Pacolli del nga SPAK pas 7 orësh: Bëra kallëzim penal për Aeroportin e Vlorës

OPINEWS

Opinion / Kur tradhëtia kërkon dialog!

Politiko 26 October 2026, 16:47
Opinion / Kur tradhëtia kërkon dialog!

Armand Maho

Për të 13-ën ditë rresht, Rama ka nxjerrë ata stolat prej guri dhe karriget duke ftuar në dialog protestuesit. Po aq herë ato i janë përmbysur, djegur apo refuzuar nga studentët, duke i treguar se rrugëdalja e vetme, që studentët, pedagogët apo mjekët të qetësohen, është dorëheqja e tij. Arsyetimi logjik është se Rama e ka humbur çdo legjitimitet për të hyrë në negociata me popullin, makthi më i madh i çdo kryepushtetari.

Rama e di këtë dhe, megjithatë, vijon të bëjë ftesa imagjinare. Më e bukura është se këto ftesa vijnë në mëngjesin pas një nate kur ka rrahur sa ka mundur protestuesit, i ka kërcënuar me gjoba, me rivendosje diktature etj . 

Me këtë mashtrim të radhës mendon se do t’ia zgjasë jetën pushtetit të tij të degraduar e të mbushur me skandale si asnjë tjetër, të bërë qesharak deri në dhimbje nga niveli i deputetëve që ka përzgjedhur, dhe të urryer deri në neveri nga rrahja e gjoksit për arritje që nuk ekzistojnë, për batërdinë me taksat, apo dhe servilizmat ndaj aktorëve ndërkombëtarë, të cilëve Rama në këmbim të mbështetjes u jep herë pas here copëza Shqipërie, duke e trajtuar vendin si çiflig personal. E thënë më qartë, kësaj qeverie i mungojnë vetëm vrasjet masive, pasi i ka bërë vendit çdo gjë që do t’i bënte një qeveri apo juntë diktatoriale e ngjashme me ato të Afrikës apo Amerikës Latine. Popullin e ka vjedhur, e ka përzënë, e ka lënë pa shërbime, e ka lodhur, e ka neveritur, e ka…

Rama, me sa duket, ka besim të tepruar tek aftësia e tij bindëse. Por janë nja dy gjëra që nuk shkojnë.

E para, kjo protestë që në fillim nuk ka pasur një kokë, ose një grup organizativ. Pra, ftesa për dialog duket se nuk është gjë tjetër vetëm se një tentativë për të bindur protestuesit të nxjerrin një kokë, që më pas mediat e pushtetit të kenë mundësi ta godasin, ndërsa vetë pushteti të ketë mundësi ta blejë. Një metodë e vjetër kjo e Ramës, e provuar në protesta të tjera si ajo e Klodian Rashës apo tek revolta e studentëve, teatri etj.

E dyta, çdokush e ka kuptuar se me këtë veprim Edi Rama kërkon të dalë si zgjidhës i problemit, ose si pjesë e zgjidhjes së tij. Ai e di fort mirë se një veprim i tillë jo vetëm do t’i jepte kohë, por do të shfaqej si një njeri me të cilin mund të merresh vesh, dhe se jo çdo gjë që thuhet në adresë të tij është e vërtetë. Pra, ai nuk kërkon negociatorë, ai kërkon ca kundërshtarë që t’i kthehen në puthadorë dhe t’i përdorë për të mbytur një lëvizje, e cila i është shndërruar në ankth. Ai instinktin e vetëmbrojtjes e ka të kultivuar që herët, dhe e di se sa më shumë të zgjasë kjo histori, aq më i hidhur është fundi. Mjeti i fundit i një proteste paqësore është guri, pas tij Zot na ruaj…

Rama duhet ta kuptojë se ata janë protestues që atë vetë, por dhe ata që i rrinë rrotull, i shikojnë si virus që duhet luftuar. S’ka nevojë t’i nxisë kush, as nuk ka nevojë t’ua kultivojë njeri urrejtjen. Sepse ata e shohin që me djersën e baballarëve të tyre fitojnë Gysët apo Lindat e të gjitha llojeve. E dinë se po sakrifikojnë më kot për t’u arsimuar, sepse vetë kryeministri, për shkak të kompleksit të inferioritetit për shkolimin, ka marrë dhe ka bërë deputet e ministër çdo idiot nga qytetet apo nga periferitë, deri në atë masë sa të vjen ndot nga vetja që duhet të mbash këtë soj e sorollop me rrogë.

E pra, ata e dinë fort mirë se të ulesh në dialog me Ramën është e njëjtë si t’i fusësh thikën pas shpine këtij vendi. Edi Rama mund të blejë, por nuk bind dot askënd për zullumet që ka bërë. Herën e parë, në 2018, studentët e akuzuan për të korruptuar dhe dilte e thërriste në TV: “Nuk jam i korruptuar”. Sot ata akuzojnë dhe për tradhtar të interesave të Shqipërisë, dhe le të dalë të thërrasë sa të dojë të kundërtën. Nuk e dëgjon më njeri! Përgjigjen do e marrë njësoj siç e marrin të gjithë ata që tradhëtojnë!

Të fundit