“Na rrëmbyen në mes të sheshit”/ Amerikani denoncon: Burra me të zeza dhe shkopinj morën të rinjtë

 

Një shtetas amerikan, Philip Gilpin., pretendon se është ndaluar për disa minuta nga një grup burrash pa shenja dalluese, teksa po kalonte pranë sheshit kryesor në Tiranë. 

Në dëshminë e tij, ai thotë se bashkë me të u shoqëruan edhe disa adoleshentë, me të cilët kishte nisur një bisedë të rastësishme.

Sipas rrëfimit të tij, ngjarja ndodhi rreth orës 11:00 të mëngjesit, kur po kthehej drejt apartamentit ku banon, pasi ishte takuar me një agjent të pasurive të paluajtshme për të parë disa ambiente të mundshme për zyra.

“Ndërsa ecja nëpër sheshin kryesor, kalova pranë një grupi prej 5 adoleshentësh që po bisedonin. I përshëndeta njëri prej tyre dhe filluam të bisedonim. Përshëndetje, si jeni, një bisedë e thjeshtë”, rrëfen amerikani.

Ai pretendon se vetëm pak minuta pas këtij kontakti, situata ndryshoi papritur, kur një grup burrash iu afrua me vrap.

“Rreth 3 minuta më vonë, një grup prej gati 10 burrash pa shenja dalluese, të veshur të gjithë me të zeza dhe me shkopinj, erdhën me vrap drejt nesh dhe na rrëmbyen fizikisht dhe na arrestuan të gjithëve”, thuhet në dëshmi.

Sipas Philip Gilpin Jr., adoleshentët u shoqëruan, ndërsa ai u mbajt për t’u marrë në pyetje nga dy persona që ai i përshkruan si “oficerë”.

Njëri prej tyre, sipas tij, i kapi dorën, i mori telefonin dhe nisi ta kontrollonte. Personi tjetër i kërkoi dokument identifikimi.

“I thashë se jam amerikan nga Bostoni dhe i tregova patentën time amerikane”, tregon ai.

Amerikani pretendon se personat që e ndaluan fotografuan patentën dhe i bënë gjithashtu një fotografi atij vetë. Pas rreth 10 minutash, gjatë të cilave thotë se u përball me përpjekje për ta frikësuar, ai u lejua të largohej.

“Pas rreth 10 minutash përpjekjeje për frikësim, më lanë të shkoja”, shprehet Gilpin Jr.

Në dëshminë e tij, ai shton se rasti nuk ishte i vetmi që kishte parë atë mëngjes. Amerikani pretendon se kishte qenë dëshmitar edhe i tre incidenteve të tjera në të njëjtën zonë, ku grupe të vogla burrash ndalonin të rinj.

“Vlen gjithashtu të përmendet se kam qenë dëshmitar i 3 incidenteve të tjera të skuadrave të vogla banditësh që endeshin nëpër shesh duke marrë çdo të ri që mund të gjenin. Të gjitha brenda një distance prej 15 minutash në këmbë”, përfundon ai.

https://www.instagram.com/p/Dejba-qoHau/?utm_source=ig_web_button_share_sheet