Bizneset: Të mbrohet prona, policia të garantojë sigurinë

Nëntë shoqata të biznesit, kanë shprehur sot shqetësimin për aktet e dhunës dhe dëmtimin e pronës publike dhe private gjatë protestave në kryeqytet, duke kërkuar nga institucionet masa konkrete për garantimin e sigurisë dhe mbrojtjen e aktivitetit ekonomik.

Në një deklaratë të përbashkët për shtyp, përfaqësuesit e biznesit dënojnë sulmet ndaj institucioneve publike, bankave, qendrave tregtare dhe objekteve të tjera të biznesit, duke theksuar se tensionet politike nuk duhet të cenojnë sipërmarrjet, punonjësit dhe investimet e tyre.

Sipas deklaratës, e drejta për të protestuar në mënyrë paqësore është një e drejtë themelore që duhet respektuar dhe garantuar nga institucionet shtetërore. Megjithatë, asnjë kauzë apo përplasje politike nuk mund të justifikojë dhunën, zjarr- vënien dhe vandalizmin.

“Bizneset, punonjësit dhe pronat e tyre nuk mund të bëhen shënjestër e tensioneve politike. Pas çdo sipërmarrjeje qëndrojnë investime, vite pune, vende pune dhe familje që sigurojnë të ardhurat prej saj”, thuhet në deklaratë.

Përfaqësuesit e biznesit theksojnë se dëmtimi i një banke, dyqani, qendre tregtare apo godine biznesi nuk prek vetëm pronarët, por edhe punonjësit, klientët dhe ekonominë e qytetit. Ndërkohë, shkatërrimi i institucioneve dhe pronës publike përbën një kosto që rëndon mbi të gjithë taksapaguesit.

Dhoma e Tregtisë dhe shoqatat i bëjnë thirrje Policisë së Shtetit dhe institucioneve përgjegjëse të marrin masa parandaluese, të garantojnë praninë e duhur policore në zonat e rrezikuara dhe të ndërhyjnë në kohë për të shmangur aktet e dhunës.

Njëkohësisht, kërkohet që veprimet e policisë të jenë profesionale, proporcionale dhe në përputhje me ligjin, duke garantuar sigurinë e protestuesve paqësorë, qytetarëve dhe punonjësve të bizneseve.

Sipas tyre, autorët e akteve të dhunshme duhet të identifikohen dhe të mbajnë përgjegjësi individuale, pa u ngarkuar faji kolektivisht qytetarëve që ushtrojnë të drejtën e protestës.

Një tjetër thirrje u drejtohet organizatorëve të protestave dhe forcave politike, të cilëve u kërkohet të distancohen qartë nga dhuna, të nxisin qetësinë dhe të kontribuojnë në shmangien e përshkallëzimit të tensioneve.

Shoqatat kërkojnë gjithashtu dokumentimin e plotë të dëmeve dhe vendosjen e komunikimit të drejtpërdrejtë ndërmjet autoriteteve dhe bizneseve të prekura, për të mundësuar denoncimin dhe ndjekjen e procedurave përkatëse.

Dhoma e Tregtisë dhe Industrisë Tiranë shpreh gatishmërinë për të bashkëpunuar me institucionet në evidentimin e shqetësimeve të sipërmarrjeve dhe forcimin e masave mbrojtëse.

Deklarata mbështetet nga Këshilli i Agrobiznesit Shqiptar, Manifaktura Shqiptare, Shoqata e Ndërtuesve, Shoqata Shqiptare e Turizmit, Shoqata e Industrisë së Përpunimit të Qumështit, Shoqata e Industrisë Ushqimore Shqiptare, Shoqata e Bimëve Medicinale dhe Shoqata e Grave Profesioniste Afariste dhe Zejtare.

Organizatat theksojnë se qëndrimi i tyre është i pavarur nga çdo përkatësi politike dhe synon mbrojtjen njëkohësisht të së drejtës për protestë paqësore, rendit publik dhe sigurisë së aktivitetit ekonomik./monitor