Flash News

Revolta studentore vijon, Kuvendi mblidhet të enjten në seancë plenare

PD refuzon tryezën e Begajt për zgjedhjet vendore: Teatër politik në shërbim të Ramës

KE distancohet nga paketa e Ramës kundër protestave: Nuk jemi përfshirë në hartimin e saj

Rrit taksat dhe tallet me kritikët, Rama për Paketën Fiskale: Grijeni sallatën tuaj të urrejtjes dhe padijes

Berisha denoncon paketën fiskale: Rama u shpall luftë bizneseve, goditje edhe për xhepat e qytetarëve

DITARI POLITIK

Revolta studentore vijon, Kuvendi mblidhet të enjten në seancë plenare

Politiko 27 October 2026, 18:19

Revolta studentore vijon, Kuvendi mblidhet të enjten në seancë

Kuvendi do të mblidhet të enjten në orën 10:00, në një seancë plenare që zhvillohet pas përplasjeve dhe kaosit të javës së kaluar në Parlament, ndërsa jashtë institucionit politik vijon protesta e studentëve, të cilët prej 15 ditësh kërkojnë dorëheqjen e kryeministrit Edi Rama.

Në rendin e ditës janë përfshirë disa çështje, mes tyre interpelanca me ministrin e Turizmit, Kulturës dhe Sportit, Blendi Gonxhja, si dhe shqyrtimi i projektligjeve që lidhen me Bankën e Shqipërisë, Këshillin Fiskal dhe mbrojtjen e konsumatorit.

Deputetët pritet të diskutojnë gjithashtu ndryshime në legjislacionin për biznesin dhe shoqëritë tregtare, si dhe administrimin e pasurive të sekuestruara dhe të konfiskuara.

Seanca e së enjtes vjen pas tensioneve të forta të javës së kaluar, kur përplasjet mes deputetëve të opozitës dhe mazhorancës detyruan ndërhyrjen e Gardës së Republikës.

Demokratët bllokuan foltoren që në nisje të seancës dhe u përfshinë në debate të ashpra me kryetarin e Kuvendit, Niko Peleshi. Në vijim, kryeparlamentari vendosi që seanca të kalonte drejtpërdrejt në votimin e projektligjeve, por ky vendim nuk i dha fund përplasjeve.

Deputetët e PD-së morën kartonët e kolegëve socialistë, duke penguar procesin e votimit, ndërsa situata u tensionua më tej nga përplasja mes deputetit socialist Ervin Hoxha dhe deputetit demokrat Fadil Kreka.

Sekretariati i Etikës vendosi përjashtimin me 60 ditë nga punimet e Kuvendit të gjashtë deputetëve të Partisë Demokratike: Flamur Noka, Belind Këlliçi, Edi Paloka, Fidel Kreka, Luçiano Boçi dhe Besart Xhaferri.

Seanca e radhës zhvillohet në një klimë të tensionuar politike, teksa protesta studentore kundër qeverisë së Edi Ramës vijon prej 15 ditësh, me kërkesën për largimin e kryeministrit nga detyra.

Të fundit