Tabaku përplaset me MIA-n për “mesazhin” e rremë të Ramës: Një imazh sqarohet, por ligji...

Një postim nga një profil i rremë në rrjetet sociale ka sjellë përplasje publike mes deputetes së Partisë Demokratike, Jorida Tabaku, dhe Agjencisë për Media dhe Informim.

Tabaku kishte shpërndarë një imazh që i atribuohej kryeministrit Edi Rama, lidhur me qëndrimin e tij për Zonat e Mbrojtura. Postimi rezultoi të mos ishte publikuar nga kryeministri, çka solli reagimin e menjëhershëm të Agjencisë për Media dhe Informim.

Në reagimin e saj, MIA e akuzoi deputeten demokrate se kishte ripublikuar një deklaratë të rreme dhe i kërkoi ta tërhiqte postimin.

“Znj. Jorida Tabaku ka ripostuar një status të paqenë, të atribuar në mënyrë të rreme Kryeministrit Edi Rama. Do të ishte e udhës që, për hir të së vërtetës dhe respektit ndaj publikut, znj. Tabaku ta tërhiqte këtë ripostim dhe t’u kërkonte ndjesë të gjithë atyre që mund të kenë rënë në kurthin e këtij falsifikimi”, deklaroi MIA.

Pak orë më pas erdhi reagimi i deputetes së PD-së që e fshiu postimin duke bërë edhe një sqarim. 

“Një imazh që qarkulloi në rrjet mobilizoi menjëherë Agjencinë e Medias dhe kryeministrin. Ndërsa një imazh sqarohet me një reagim; një ligj që bie ndesh me standardet europiane korrigjohet me votë në Kuvend duke zhbërë amendimet. Kërkesa e Parlamentit Europian për shfuqizimin e ndryshimeve në ligjin për zonat e mbrojtura është zyrtare dhe e qartë. Nuk është as dezinformim, as pavërtetësi dhe nuk mund të fshihet pas zhurmës së rrjeteve sociale.

Shqipëria nuk ka nevojë për propagandë rreth një imazhi te rremë. Ka nevojë për përgjigje mbi faktet. Shfuqizo ligjin për zonat e mbrojtura! Këtë duan shqiptarët, këtë kërkojnë protestuesit, kjo i duhet Shqipërisë, këtë na dikton Europa tani. Kryeministri duhet t’i përgjigjet kësaj kërkese, sepse ora e integrimit europian vazhdon dhe Shqipëria nuk ka më kohë për të humbur as kohë për propagandë” – thuhet në reagimin e Tabakut.

Sakaq, MIA reagoi sërish,  duke kritikuar Tabakun për faktin se nuk kërkoi ndjesë publike.

“Duke qenë se znj. Tabaku, në vend të një ndjese ndaj audiencës së cilës i përcolli informacionin e rremë, zgjodhi të ironizojë MIA-n për angazhimin e saj në luftën kundër dizinformimit”, thuhet në reagimin e Agjencisë.