U zhduk kur duhej të jepte llogari, Balluku u shfaq pas muajsh në Kuvend për reformën e Ramës mes hetimeve të SPAK

Ish-zv.kryeministrja Belinda Balluku u shfaq në Kuvend në orët vona të natës së mbrëmshme në Kuvend, jo për të dhënë përgjigje për çështjet që po hetohen nga SPAK, por për të votuar Reformën Territoriale që shkurton numrin e bashkive nga 61 në 46.

Pas disa muajsh mungesë në seancat parlamentare, ish-ministrja u rikthye në sallë në një moment vendimtar për mazhorancën e Edi Ramës.

Balluku ngriti kartonin pro reformës, duke u bashkuar kështu me shumicën që miratoi shkrirjen e 15 bashkive në vend pas ultimatumit që Rama kishte dhënë në mbledhje grupi.

Madje, siç është raportuar më herët në media, prania e saj nuk u kalua pa u vënë re, por shkaktoi edhe përplasje dhe tensione me opozitën.

Rikthimi i Ballukut nuk mund të shkëputet nga çështja që e ka vendosur prej muajsh në qendër të vëmendjes publike.

Kujtojmë se SPAK e ka marrë të pandehur për shkelje të barazisë në tenderin e tunelit të Llogarasë dhe e ka hetuar edhe për procedura të tjera prokurimi. Në dhjetor 2025, Prokuroria e Posaçme i kërkoi Kuvendit autorizimin për arrestimin e saj dhe heqjen e imunitetit, por në mars 2026, mazhoranca parlamentare nuk e miratoi kërkesën e SPAK dhe Kuvendi votoi kundër heqjes së imunitetit. 

Në këtë sfond, prania e saj për votimin e Reformës Territoriale solli reagime të shumta  për mënyrën se si funksionon mazhoranca dhe për standardin e llogaridhënies që zbatohet ndaj përfaqësuesve të saj.

Për një vendimmarrje që prek drejtpërdrejt përfaqësimin e komuniteteve lokale, Balluku ishte e pranishme dhe votoi pro në mes të natës, ndërsa çështjet e saj me drejtësinë mbeten të pazgjidhura.

Prandaj, vota e Ballukut shihet si një mbështetje për projektin e Ramës i cili doli publikisht në mbrojtje të Ballukut, ku deklaroi se ajo nuk akuzohej për korrupsion dhe se hetimi duhej të vijonte pa ndërhyrje politike.

Balluku nuk u shfaq mbrëmë për t'u dhënë përgjigje pyetjeve që lidhen me hetimet e SPAK-ut, as debatit mbi vendimin e Kuvendit për të mos autorizuar arrestimin e saj, ndonëse llogaridhënia publike mbeten çështje që nuk mund të shmangen vetëm me një votë në Kuvend.

Reforma e miratuar pas mesnatës parashikon bashkimin e 15 bashkive me njësi të tjera vendore, edhe pse prej muajsh pati protesta nga ana e qytetarëve, paralelisht me kundërshtimin e opozitës, me argumnetet se  ndryshimi i hartës i shërben interesave elektorale të qeverisë dhe jo nevojave të qytetarëve./S.Gj-Politiko.al