Tentuan të rebelohen, si u kthyen Braçe dhe Spiropali në 'shashka pa zhurmë'

Reforma Territoriale u miratua në orën 1:15 të mëngjesit të 9 tetorit, me 85 vota pro të mazhorancës, pas një seance maratonë të shoqëruar me debate dhe tensione jo vetëm me opozitën, por edhe mes vetë socialistëve.

Por përtej rezultatit, vëmendjen e morën dy deputetë të mazhorancës, Erion Braçe dhe Elisa Spiropali të cilët kishin deklaruar publikisht qëndrimin e tyre kundër kësaj reforme. Mes emrave që kundërshtuan u përfol edhe socilisti Vullnet Sinaj, por ai edhe pse u rreshtua krah kartonëve jeshilë, deri tani as nuk e mohoi, as nuk e pranoi qëndrimin e tij. 

Konkretisht, Braçe kundërshtoi hartën e re administrative-territoriale, ndërsa Elisa Spiropali vuri në diskutim nëse ndryshimi i numrit të bashkive mund të konsiderohej një reformë e mirëfilltë. Të dy kritikuan, me argumente të ndryshme, mënyrën se si po zhvillohej procesi, por kur erdhi momenti i votimit, të dy u bashkuan me mazhorancën.

Presioni i Ramës për votën
Përpara se reforma të shkonte në votim, kryesocialisti Rama zhvilloi një mbledhje me grupin parlamentar të Partisë Socialiste, ku kërkoi unifikimin e votave. Sipas raportimeve mediatike , kryeministri pati një debat që zgjati rreth 45 minuta me Erion Braçen, për të siguruar mbështetjen e tij për reformën.  

Sipas raportimeve, gjatë mbledhjes Rama u kërkoi deputetëve të mbështesnin projektin dhe paralajmëroi se ata që nuk do të votonin pro duhej të largoheshin nga grupi parlamentar.

“Kush nuk voton reformën territoriale sot, le të iki”, mësohet të jetë shprehur kryeministri. 

Publikisht, Braçer kishte deklaruar se ndryshimi i hartës administrative nuk garanton vetvetiu një reformë të qëndrueshme dhe se duhej të diskutohej më gjerësisht për kompetencat dhe financimin e pushtetit vendor.

“Qëndrueshmëria e reformave nuk vjen nga votat, por nga parimet”, deklaronte Braçe. Në thelb, kundërshtimi i tij lidhej me faktin se një reformë e tillë,nuk mund të reduktohej në bashkimin ose ndarjen e njësive vendore. Por pas debatit me Ramën dhe mbledhjes së grupit, Braçe votoi pro. 

I pyetur pas seancës nëse kryeministri e kishte bindur, ai u përgjigj: “Nuk më bindi fare, jam kundër prapë”.

Për pyetjen se përse kishte votuar pro, deputeti tha se do ta shpjegonte më vonë: “Jua shpjegoj nesër”.

Pra, Braçe këmbënguli se nuk kishte ndryshuar qëndrim për hartën, por vota e tij përputhej me vendimin e mazhorancës. Në këtë pikë, kontrasti mes deklaratave dhe veprimit politik është i qartë, ndërsa motivi i plotë i vendimit mbetet për t'u shpjeguar prej tij.

'Nuk jemi kartona', por vota shkoi pro

Edhe deputetja e PS, Elisa Spiropali mbajti një fjalim kritik në Kuvend, për mënyrën se si po emërtohej reforma.

“Unë besoj se sot, Reforma Territoriale, nuk është një reformë. Duhet ta themi këtu hapur”, deklaroi ajo. Spiropali argumentoi se çështja nuk është thjesht sa bashki do të ketë vendi, por sa pushtet, kompetenca dhe autonomi duhet të kenë ato. Ajo kërkoi që përgjegjësia të mos shihej vetëm te kryetarët e bashkive, por në të gjitha nivelet e qeverisjes.

Por kritika e saj më e drejtpërdrejtë ishte ndaj mënyrës se si drejtohen deputetët brenda partisë.

“Ne s’jemi as kartona, as njerëz pa përgjegjësi. Mënyra se si ju na drejtoheni është revoltuese. Ju thotë kryetari çfarë duhet të bëni dhe ju e bëni”, tha Spiropali.

Pra, fjalët e saj krijuan përshtypjen e një distancimi nga bindja ndaj vendimit të kryetarit, por kur erdhi momenti i votimit, Spiropali votoi pro reformës, dhe u rreshtua me ushtarët e tjerë të bindur. 

Në fund, rebelimi në publik nuk e ndryshoi as rezultatin e votimit, as vendimin e mazhorancës.

Siç edhe u pa nga votimit, Braçe dhe Spiropali ngritën zërin, por kur erdhi momenti për të zgjedhur mes qëndrimit të shprehur dhe votës, iu nënshtruan urdhrit dhe presioneve të Edi Ramës duke na bindur më shumë se shashka e tyre u ndez në fjalime, por në votim nuk pati shpërthim./S.Gj-Politiko.al