Pse Rama, pas çdo skandali preferon një edhe më të madh

Alfred Lela

Kur Edi Rama deklaronte pa drojë dikur se rrinte deri në katër të mëngjesit zgjuar, për të parë Gangs of London, shumëkujt mund t’i jetë dukur si një trill ose shfrim i Kryeministrit me criminal fiction pas një dite të gjatë pune.

Edi Rama sa kishte filluar atëherë dhe, për ata që nuk e njihnin mirë, edhe gënjeheshin prej piruetave të tij.

Siç u dëshmua në sa e sa dosje, përgjime dhe episode të dhënieve e marrjeve kryeministrore, kur Rama shpallte faqebotës pëlqimin për Narcos, Escobar apo Gangs of London, ishte duke shpjeguar një prirje të brendshme, jo një kalimkohe, jo një parapelqim për një zhanër të ekranit apo kinematografisë.

Rama me anë të shijeve po shpaloste alter egon, fytyrën tjetër të narcisit.

Rasti më i fundit, i Ron Yeffet, i ngarkuar siç e thotë vetë izraeliti, për të bërë punët e pista të Ramës, na bën me dije se shefi i qeverisë pas çdo skandali. ku shpërfaqet kjo anë e tij e errët, nuk zmbrapset për t’u rikthyer me vone te prirja e brendshme, por shkon edhe më thellë abysit të asaj prirjeje.

Mendjeve normale do ua merrte mendja se pas ‘skandalit Agasi’ me filmime, përgjime, sekuestrime, qilarë vere, repertor të plotë dhune e shantazhesh, Rama do të bënte një kthesë taktike. Gabim!

Ai ndërroi një koordinator vendas të krimit me një të huaj.

Ky është, me sa duket, Ron Yeffet, izraeliti që u shfaq në përgjimet e publikuara nga Arben Ahmetaj në “Çim Peka Live” të SyriTV. Ai është globalizimi i prirjes psikopatologjike të Ramës për noir-in, të errëtën, të ndaluarën, kriminalen.

Skema është e qartë dhe, si në rastet e Camorrës, Cosa Nostrës apo klaneve të tjera të krimit ndërkombëtar, përmban kompani që fshihen brenda kompanive të tjera, për të mbuluar aktivitete të paligjshme, duke krijuar guaska mbrojtëse ligjore dhe financiare. E veçanta e rastit Yeffet është se guaska-mëmë është shteti shqiptar i prirë nga Edi Rama. Pra, është “Kayo”, e karajfilit të PS, që vepron si mbrojtëse veprimesh të jashtëligjshme kompanish të tjera, regjistruar me juridiksionin, siglën dhe mbrojtjen e Republikës së Shqipërisë.

Çka e bën këtë rast specifik dhe të sofistikuar nuk është krimi, vjedhja dhe manipulimi në vetvete, por përpjekja e Ramës për të krijuar një guaskë mbrojtëse globale për veten. Të cilën mund ta përdorë si mjet lobimi, fshehje pasurie, mbrojtje nëpërmjet lidhjeve dhe financave, si në rastin kur i rrezikohet pushteti dhe integriteti, ashtu dhe në rastin e rikthimit në pushtet, nëse bie, nesër.

Rama me “Kayo”-n dhe kompanitë e aktivitetet e Yeffetit nuk është duke gostitur mikun izraelit, por është duke lidhur fije me një botë të nëndheshme ndërkombëtare të interesave dhe lidhjeve okulte për synime krejtësisht personale.

Në këtë transaksion Shqipëria, burimet, financat dhe interesat e saj janë lënë peng.

Kjo skemë është më perfide se të tjerat, sepse synon ta bëjë Ramën pjesë të një rrjeti global, një kabale shkëmbimesh të nëndheshm,e përfitimet e të cilave nxirren nga burime dhe aktorë shtetërorë dhe shkojnë në rezerva dhe aktorë privatë.

Ky është bitcoin-i virtual i Ramës në tregun imobiliar ndërkombëtar, ku pasuria më e patundshme është rrjeti dhe interesat që lidhen me të. Rama e ka nxjerrë Shqipërinë në ankand dhe këtë ka kapur me intuitë, më mirë se asgjë tjetër, inteligjenca kolektive e protesttës, kur shpalli që në fillim “Shqipëria nuk është në shitje!’.

Ka vetëm një mënyrë për ta ndalur këtë.