Dosja Hyseni-Agasi/ 508 komunikime në dy muaj, mesazhet intime dhe informacionet për takimet me Ramën

Nga dosja hetimore ndaj ish-drejtoreshës së SHISH, Vlora Hyseni, dalin detaje të reja mbi komunikimet e saj me Ergys Agasin, i cili në atë periudhë ishte nën hetim dhe më pas u shpall në kërkim nga drejtësia.

Në qendër të materialit janë qindra komunikime përmes aplikacionit “Signal”, telefonata, video-thirrje dhe mesazhe, të cilat sipas hetuesve hedhin pikëpyetje mbi versionin e Hysenit se Agasi ishte një “bashkëpunëtor” i saj.

Bëhet fjalë për 508 forma komunikimi të regjistruara në telefonin e Agasit, vetëm përgjatë një periudhe rreth dy-mujore.

508 komunikime nga 28 qershori deri më 26 gusht

Sipas dosjes, komunikimi mes Hysenit dhe Agasit ka nisur të dokumentohet më 28 qershor dhe ka vijuar deri më 26 gusht 2026, ditën e arrestimit të Agasit.

Në këtë periudhë janë evidentuar:

• 70 telefonata hyrëse nga Vlora Hyseni;

• 17 telefonata dalëse nga Ergys Agasi;

• 28 telefonata të humbura;

• 25 telefonata pa përgjigje;

• si dhe video-thirrje, mesazhe, fotografi dhe materiale të tjera.

Në total, në aparatin e Agasit janë gjetur 508 forma komunikimi mes dy personave.

Hetuesit e konsiderojnë komunikimin të vazhdueshëm dhe periodik, ndërsa fakti që ai ka vijuar edhe pasi Agasi ishte shpallur në kërkim është një prej elementeve të vlerësuara në dosje.

“Zemër”, “shpirt” dhe “do përfundojmë keq”

Një pjesë e rëndësishme e materialit lidhet me mënyrën se si Hyseni i drejtohet Agasit në bisedat e tyre.

Në një prej mesazheve ajo shkruan:

“Zemër, thjesht duhet të koncentrohemi te halli jot.”

Më pas:

“Të gjithë ne.”

Në një tjetër:

“Do përfundojmë keq, shpirt.”

Sipas prokurorëve, këto komunikime tregojnë një lidhje personale dhe të vazhdueshme mes tyre dhe, përtej raportit që Hyseni e ka përshkruar si bashkëpunim, shfaqin edhe solidarizim me situatën e Agasit.

Hyseni i tregon për takimin me Ramën

Në dosje janë evidentuar edhe mesazhe ku Hyseni i tregon Agasit për takimet e saj me kryeministrin Edi Rama.

“Po më presin me shku te KM… Jo mo zemër, unë një orë nuk rri më shumë me atë”, shkruan ajo në një prej komunikimeve.

Më 24 gusht, sipas dosjes, ajo i shkruan:

“Nesër duhet ta takoj KM në 8:30.”

Në komunikime të tjera ajo i jep informacion edhe për takime me partnerë ndërkombëtarë.

“Me doli një takim urgjent… Me sauditet… Kthehem nesër në KS prapë”, thuhet në një prej mesazheve.

Hetuesit i kanë përfshirë këto komunikime në kuadër të dyshimeve mbi informacionet që Hyseni i përcillte Agasit.

“Skënderi më thirri...”/ Në fokus edhe drejtori i Policisë

Një tjetër komunikim i evidentuar është ai i 19 gushtit.

Hyseni i shkruan Agasit:

“Skënderi më thirri me u taku të hënën… Të shpresojmë që ka porosit KM…”

Në materialin hetimor sqarohet se “Skënderi” i referohet Skënder Hitës, Drejtorit të Përgjithshëm të Policisë së Shtetit.

Sipas hetuesve, ky komunikim është një tjetër element që tregon se Hyseni i përcillte Agasit informacione mbi zhvillime dhe kontakte të saj në nivele të larta të institucioneve.

“Sa shumë gjëra na kanë bërë ne”

Më 22 gusht, vetëm pak ditë para arrestimit të Agasit, komunikimi vijon me tone të tjera.

Hyseni i shkruan:

“Sa sh gjëra na kanë bërë ne… Të gjitha shpirt… O shpirt, kjo është një situatë që do ja hedhim… Problemi është koha… Sa konsistencë kemi.”

Në një tjetër mesazh thuhet:

“Çfarë na bënë o Zot.”

Sipas dosjes, përdorimi i shumësit në këto komunikime është vlerësuar nga hetuesit si tregues i identifikimit të Hysenit me situatën dhe interesat e Agasit.

Informacion edhe për Ballën dhe Ballukun

Në një tjetër komunikim, Hyseni i përcjell Agasit informacion që lidhet me drejtues politikë.

“Taulant Balla kryetar Kuvendi… Kështu janë infot… Bela me Taon shoku”, thuhet në mesazhin e përfshirë në dosje.

Materiali sqaron se bëhet fjalë për Taulant Ballën dhe Belinda Ballukun.

Edhe ky komunikim është pjesë e elementeve që prokuroria po shqyrton për të përcaktuar natyrën dhe rëndësinë e informacionit që qarkullonte mes tyre.

Çfarë tha Hyseni në SPAK?

Më 18 shtator 2026, sipas dosjes, Vlora Hyseni është marrë në pyetje në cilësinë e personit me dijeni për veprën penale.

Ajo ka pranuar komunikimin e vazhdueshëm me Agasin deri në ditën e arrestimit të tij.

Hyseni ka deklaruar se Agasi i kishte ofruar “bashkëpunim”, por ka mohuar takimet fizike me të dhe faktin që ai të kishte siguruar informacione nga SHISH.

Ajo është shprehur gjithashtu se do të kthente përgjigje zyrtare me shkresë të klasifikuar për origjinën e diagrameve të sekuestruara.

9 dokumente me të dhëna të ngjashme me SHISH

Në një tjetër pjesë të dosjes përmendet sekuestrimi i një automjeti në pronësi të Agasit më 20 korrik 2026 në ambientet e “Equos Resort” në Tiranë.

Brenda automjetit, sipas materialit hetimor, janë gjetur nëntë printime në format të madh, në të cilat paraqiteshin diagrame me të dhëna të ngjashme me ato të prodhuara nga SHISH.

Sipas dosjes, Agasi ka pranuar se automjeti ishte i tij dhe se materialet i kishte lënë aty me qëllim që ato të gjendeshin nga Prokuroria e Posaçme.

Prokuroria: Nuk ishte thjesht “bashkëpunëtor”

Pikërisht këtu qëndron një nga elementet kryesore të dosjes.

Sipas hetuesve, komunikimet e zbuluara nuk përputhen me versionin se Agasi ishte thjesht një “bashkëpunëtor” i Hysenit.

Në dosje thuhet se nga përmbajtja e komunikimeve krijohet dyshimi se Agasi ishte personi që merrte dhe diktonte informacionin e marrë.

Po ashtu, prokurorët theksojnë se Hyseni nuk kishte vënë në dijeni instancat përkatëse, brenda apo jashtë SHISH, për komunikimin me Agasin.

Hetimi tashmë fokusohet te roli i Hysenit

Në tërësinë e saj, dosja ngre dyshime mbi natyrën e marrëdhënies mes ish-kryetares së SHISH dhe Ergys Agasit, duke vendosur në qendër jo vetëm komunikimet personale, por edhe informacionet që Hyseni dyshohet se i ka përcjellë.

Mesazhet, telefonatat dhe materialet e sekuestruara tashmë janë pjesë e hetimit dhe do të jenë objekt i vlerësimit të mëtejshëm nga organet e drejtësisë.

Hyseni mohon që Agasi të ketë marrë informacione nga SHISH dhe ka dhënë një version tjetër për natyrën e komunikimit mes tyre. Vlerësimi përfundimtar i këtyre pretendimeve i takon organeve të drejtësisë.