Nga braktisja e PS te kërcënimi nga Bajrat/ Pse po hesht Rama për Marjana Koçekun?

Çfarë ndodhi?

Protesta qytetare, e cila sot shënon ditën e 18-të të revoltës para Kryeministrisë, solli një çarje brenda Partisë Socialiste. Ndoshta atëherë kur nuk pritej, nga radhët e socialistëve erdhi dezertimi i parë.

Konteksti

Marjana Koçeku, deputete e Qarkut Shkodër e cila doli nga listat e mbyllura të zgjedhjeve të 11 Majit, njoftoi largimin nga grupi i PS. Në një postim në Facebook, Koçeku i dha një sinjal të qartë Ramës se idealet dhe vlerat e një njeriu, nuk mund të vendosen në shërbim të partisë dhe propagandës së saj.

“Prej sot jam deputete e pamvarun. Idealet e vlerat e mia janë ato që i kam pasë e i kam shprehë qysh para se me u asociu me nji parti. Ato m’i diftojnë kufijtë”, shkroi ajo.

Socialistët me leksione morali ndaj Koçekut

Fill pas deklaratës së deputetes shkodrane, në PS shpërtheu revolta. Studentja Helena Kaçe, e cila hapi Kongresin e PS-së, i kërkoi Koçekut të dorëzonte mandatin, pasi sipas saj privilegjin e të qenurit deputete, ia dha sigla ‘e lavdishme’ e PS. Madje, Kaçe e quajti “hipokrite” Marjana Koçekun, me argumentin se pa dorëzuar karrigen, nuk mund të jetë e pavarur.

“Ka një lloj hipokrizie dhe mosmirënjohje në politikë. Të futesh në Parlament përmes listave të mbyllura, me votat dhe angazhimin e një partie, e pastaj të kujtohesh se ‘idealet e kufijtë moralë’ të shtyjnë të dalësh e pavarur. Pavarësia e vërtetë nuk nis duke dorëzuar teserën e mbajtur karrigen.

Nis duke dorëzuar mandatin. Sepse ato vota që të sollën në Parlament ishin të njerëzve që votuan një logo dhe vizion politik.

Nëse idealet e tua nuk përkojnë më me atë shtëpi politike, hapi më parimor është tua kthesh mandatin atyre që të besuan. Suksese paç në rrugëtimin tënd të ri Marjana si e pavarur, po bëje si duhet: Dorëzo mandatin!”, u shpreh Kaçe.

Edhe kryetari i Bashkisë së Lezhës, Pjerin Ndreu, reagoi me një ton moralizues ndaj vendimit të Koçekut për t’u larguar nga grupi socialist dhe për t’u pozicionuar si e pavarur.

Ndreu, njësoj si Kaçe, i mbajti leksion fisnikërie duke kërkuar nga Koçeku dorëzimin e mandatit, si akt që sipas tij, do i jepte kuptim moral dhe fisnik largimit të deputetes.

“Kushdo, në kushte e rrethana të tjera, mund të ndryshojë mendim apo ide, mund të mos e gjejë më veten ose të mos përputhet me një forcë politike. Kjo është krejt normale. Por nderi i caktimit në krye të listës politike të qarkut më të madh në veri, pa asnjë kontribut politik të mëparshëm, moralisht nuk duhet të keqpërdoret. Heqja dorë nga mandati i marrë në sajë të votës së mijëra socialistëve shkodranë do të ishte një akt që do ta fisnikëronte miken time, Marjana Koçeku”, shkruan Ndreu.

Por, si nisi përplasja Rama-Koçeku?

Top Channel raportoi një ditë më parë se zanafilla përkon me datën 8 qershor, kur kryetari i PS-së, Edi Rama, ishte në Shkodër për turin e 35-vjetorit të PS-së. I veshur me një bluzë ku ishte stampuar një flamingo, Rama ka hasur me një koment të Koçekut e cila është shprehur: “I nderum kryeministër, mirë se erdhe në Shkodër si Gen Z, më pëlqen shumë bluza që ke veshur sot…”.

Kjo ishte shkëndija që solli debatin mes deputetes dhe Ramës, gjatë një takimi informal mes tyre. Siç duket, biseda që kanë konsumuar të dy dhe ato çfarë Rama i ka thënë Koçekut, nuk janë mirëpritur nga deputetja, e cila i është kundërpërgjigjur.

Pasi njoftoi braktisjen e grupit të PS, Koçeku postoi në profilin e saj zyrtar një emoji flamingo, që është kthyer në simbolin e protestës qytetare e cila është quajtur “Revolucioni Flamingo”.

I pyetur për largimin e Koçekut, kreu i grupit Taulant Balla tha se do të diskutonin në një moment të dy, ndërsa kolegët socialistë pohuan se deputetja kishte fikur telefonin dhe nuk i ishte përgjigjur thirrjeve të tyre.

Kërcënimi nga Bajrat

Mirëpo në vorbullën e reagimeve dhe heshtjes, vetë Koçeku bëri një deklaratë të fortë në profilin e saj. Haptazi, ajo tregoi se ishte kërcënuar nga banda e Bajrave të Shkodrës.

“Ky mesazh i drejtohet Bajrajve të Shkodrës. Nëse familjes teme i preket kjoftë edhe nji qime floku, unë s’kam me lanë pa ju shkatërrue, sa ta kem jetën”, shkruan Koçeku.

Policia e Shkodrës deklaroi për Politiko.al se deri tani nuk është depozituar asnjë kallëzim zyrtar lidhur me këto pretendime.

“Nuk kemi asnjë kallëzim e as njoftim lidhur me këtë njoftim”, thanë burime zyrtare nga Policia.

Reagimi i parë nga radhët e PS ishte indiferent. Igli Hasani, kreu i Komisionit të Jashtëm, u shpreh se nuk ishte puna e tij të merrej me denoncimin dhe se kushdo që ndjehet i kërcënuar, t’i drejtohet policisë.

“Kushdo që ndihet e kërcënuar, kushdo që ka indicie duhet t’i drejtohet organeve, Policisë së Shtetit, nëse ka edhe një indicie. Se kush zgjedh instagramin për të bërë deklarata, kjo nuk është puna ime fare. Duhet ti drejtohen policisë së Shtetit”, tha Hasani.

Heshtja e Ramës

E habitshme është se nga ana e kryeministrit nuk ka asnjë reagim. Rama ka heshtur qysh në ditën kur Marjana Koçeku njoftoi largimin nga grupi i PS. Rama, që zakonisht reagon ndaj çdo përplasjeje politike, këtë herë ka zgjedhur heshtjen – një heshtje që po ngre gjithnjë e më shumë pikëpyetje. Ndoshta sepse në sulm janë hedhur socialistët, madje dhe Bajrat e Shkodrës./ Politiko.al